Зборнік матэрыялаў па гісторыі зніклых вёсак "Зніклыя старонкі Дубровенскага летапісу"


     Вывучэнне гісторыі роднага краю дае людзям базу для духоўнага станаўлення, для фарміравання правільнага светапогляду, для матывацыі прафесійнай дзейнасці. Краязнаўства з’яўляецца адным з галоўных напрамкаў работы цэнтральнай раённай бібліятэкі горада Дуброўна. З мэтай збору і захавання інфармацыі аб зніклых вёсках Дубровенскага раёна, папулярызацыі краязнаўчай дзейнасці і выхавання патрыятычных пачуццяў распрацаваны зборнік гісторыі зніклых вёсак “Зніклыя старонкі Дубровенскага летапісу”.

     У зборніку прадстаўлена інфармацыя аб 114 населеных пунктах, аб даце іх узнікнення і адміністрацыйнай прыналежнасці, дададзены матэрыял аб славутасцях і вядомых ўраджэнцах, асветлены значныя гістарычныя падзеі, даты і прычыны знікнення населеных пунктаў. У дадатак да агульнага матэрыялу размешчаны фрагменты картаграфічных дакументаў, на якіх адлюстравана пэўная мясцовасць.

     Для складання буклета быў прааналізаваны матэрыял з кнігі “Памяць. Дубровенскі раён.”, артыкулы з раённай газеты “Дняпроўская праўда”, спісы населеных месцаў Магілёўскай губерніі, прадстаўленыя сайтам Прэзідэнтскай бібліятэкі імя Б.М. Ельцына, даследавана мноства картаграфічных дакументаў і складзены тэрміналагічны слоўнік. Трэба адзначыць, што пры дасканалым вывучэнні картаграфічных дакументаў, можна сутыкнуцца з тым, што назвы населеных пунктаў у розныя гістарычныя перыяды змянялі свой марфемны склад, гэта тлумачыцца ўздзеяннем часавых і гістарычных абставін.

       У 2014 годзе выданне стала пераможцам абласнога тура рэспубліканскага конкурсу «Бібліятэка – асяродак нацыянальнай культуры» ў намінацыі «Пошукавая і даследчая дзейнасць» і заняла трэццяе месца на рэспубліканскім туры конкурсу.

     Дадзены зборнік прызначаны для настаўнікаў, гісторыкаў, краязнаўцаў, бібліятэкараў, супрацоўнікаў музея і ўсіх тых, хто цікавіцца гісторыяй роднага краю.